நீங்கள் தேடியது "தூத்துக்குடி மாநகராட்சி"

தூத்துக்குடி:

தூத்துக்குடி மாநகராட்சியில் நாளைமறுநாள்(புதன்கிழமை) முதல் பிளாஸ்டிக் பொருட்களுக்கு தடை அமலுக்கு வருவதாக, ஆணையாளர் ஆல்பிஜான் வர்க்கீஸ் தெரிவித்து உள்ளார்.

இது குறித்து அவர் வெளியிட்டுள்ள செய்திக்குறிப்பில் கூறி இருப்பதாவது:-

தூத்துக்குடி மாநகராட்சி எல்கைக்கு உட்பட்ட பகுதிகளில் பிளாஸ்டிக் பொருட்களான பிளாஸ்டிக் விரிப்புகள், உணவு பதார்த்தங்கள் பார்சலுக்கு பயன்படுத்தும் கவர்கள், உணவு மேசை விரிப்புகள், தட்டுகள், பிளாஸ்டிக் ஒட்டப்பட்ட தட்டுகள், கப்புகள், தண்ணீர் பாக்கெட்டுகள், அனைத்து வித பிளாஸ்டிக் பைகள், கொடிகள், உறிஞ்சு குழல்கள் உள்ளிட்ட ஒருமுறை பயன்படுத்தும் பிளாஸ்டிக் பொருட்கள் தடை செய்யப்பட்டு உள்ளன. இதன் மூலம் தூத்துக்குடி மாநகராட்சியை பிளாஸ்டிக் பொருட்களின் பயன்பாடு இல்லாத நகரமாக அறிவிக்க தேவையான அனைத்து நடவடிக்கைகளும் மேற்கொள்ளப்பட்டு வருகிறது.

இது தொடர்பாக கல்வி நிறுவனங்கள் பொதுமக்கள் மற்றும் வர்த்தக நிறுவனங்களுக்கு போதிய விழிப்புணர்வு ஏற்படுத்தப்பட்டு வருகிறது. அதன் ஒரு பகுதியாக 67 வணிக கடைகளில் “பொதுமக்கள் தாங்கள் பயன்படுத்தும் உணவு மற்றும் இதர பொருள்களின் பிளாஸ்டிக் பொதி தாள்களை சேகரித்து கொடுக்கும் 10 எண்ணத்திற்கு ஒரு பரிசு வழங்கப்பட்டு வருகிறது. இதுவரை சுமார் 1 லட்சத்து 20 ஆயிரம் பிளாஸ்டிக் பொதி தாள்கள் சேகரிக்கப்பட்டு உள்ளன. மேலும் வணிக நிறுவனங்களின் சார்பாக பொது மக்களிடம் போதிய விழிப்புணர்வு ஏற்படுத்தும் விதத்தில் தள்ளுபடி, சலுகைகள் மற்றும் இலவசங்கள் வழங்கப்பட்டு வருகிறது.

இதனால், பொதுமக்களிடம் பிளாஸ்டிக் குறித்த விழிப்புணர்வு ஏற்பட்டு, பிளாஸ்டிக் ஒழிப்பு செயல்பாடுகள் அதிகப்படியான வரவேற்பை பெற்று உள்ளது. எனவே, சுற்றுச்சூழலை பாதுகாக்க வேண்டியதன் அவசியத்தை கருத்தில் கொண்டும் சுற்றுப்புறத்் தூய்மையை மேம்படுத்தும் வகையிலும் பொது மக்கள் தொடர்ந்து கடை வீதிகளுக்கு செல்லும் போது துணிப்பையை கொண்டு செல்லவும் இறைச்சி, உணவு பதார்த்தங்கள் வாங்கச் செல்லும் போது, பாத்திரங்களை கொண்டு செல்ல வேண்டும்.

மேலும் வணிகர் சங்கங்கள் கையிருப்பில் உள்ள பேக்கிங் பொருட்களை முழுவதுமாக காலி செய்யும் வகையில் கால அவகாசம் நீடிப்பு செய்ய வேண்டுகோள் விடுத்தனர். அவர்களின் வேண்டுகோளுக்கு இணங்க கையிருப்பில் உள்ள பேக்கிங் பொருட்களை காலி செய்ய 2 மாத கால அவகாசம் நீடிப்பு செய்யப்பட்டு உள்ளது.

இந்த நிலையில் நாளைமறுநாள்(புதன்கிழமை) முதல் தூத்துக்குடி மாநகராட்சி எல்லைக்கு உட்பட்ட பகுதிகளில் பேக்கிங் பொருட்களை தவிர இதர பிளாஸ்டிக் பொருட்கள் அனைத்தும் தடை செய்யப்பட்டு உள்ளது. எனவே, தடை உத்தரவை மீறி தடை செய்யப்பட்ட பொருட்களை பயன்படுத்தும் பட்சத்தில் மாநகராட்சி சட்ட விதிகளின்படி தக்க மேல் நடவடிக்கை எடுக்கப்படும்.

இவ்வாறு அவர் தெரிவித்து உள்ளார்.

தூத்துக்குடி:

தூத்துக்குடி மாநகராட்சியை அடுத்த மாதம் 15-ந் தேதி முதல் ஒரு முறை மட்டும் பயன்படுத்தும் பிளாஸ்டிக் பொருட்களின் பயன்பாடு இல்லாத நகரமாக அறிவிக்க பல்வேறு நடவடிக்கைகள் எடுக்கப்பட்டு வருகிறது. அதன் தொடர்ச்சியாக பொதுமக்கள் தாங்கள் பயன்படுத்தும் மளிகை பொருட்கள், பிஸ்கட், சாக்லெட் போன்றவற்றின் கவர்களை தனியாக பிரித்து, அவற்றை சம்பந்தப்பட்ட நிறுவனங்களுக்கு திருப்பி அனுப்பி வைக்க நடவடிக்கை எடுக்கப்பட்டு வருகிறது.

இதனால் பிளாஸ்டிக்கை கொடுங்கள் - பரிசை பெறுங்கள் என்ற புதிய திட்டம் தொடங்கப்பட்டு உள்ளது. இந்த திட்டத்தின்படி பயன்படுத்திய 10 பிளாஸ்டிக் கவர்களை சேகரித்து கடைகளில் வழங்குபவர்களுக்கு ஒரு பரிசு கூப்பன் வீதம் வழங்கப்படும். அதில் உள்ள பரிசுத் தொகையை பொருட் கள் வாங்கும் தொகையில் இருந்து கழித்துக் கொள்ளலாம். இதற்காக கடைகளில் தனியாக பெட்டி வைக்கப்பட்டு உள்ளது. இது தூத்துக்குடி மாநகராட்சியால் முதன் முதலாக செயல்படுத்தப்படும் முன்னோடி திட்டம் ஆகும்.

இந்த திட்டம் தொடக்க நிகழ்ச்சி சுடலை காலனியில் நடந்தது. நிகழ்ச்சியை மாநகராட்சி ஆணையாளர் ஆல்பிஜான் வர்க்கீஸ் தொடங்கி வைத்தார். மத்திய வியாபாரிகள் சங்க தலைவர் விநாயகமூர்த்தி முன்னிலை வகித்தார்.

நிகழ்ச்சியில் ஆணையாளர் ஆல்பிஜான் வர்க்கீஸ் கூறும் போது, பொதுமக்கள் இந்த பரிசுப் போட்டியில் ஆர்வமுடன் பங்கேற்க வேண்டும். கடைகளுக்கு செல்லும் போது துணிப்பை மற்றும் பாத்திரங்களை கொண்டு சென்று சுற்றுச்சூழலை பாதுகாக்க உதவ வேண்டும். ஒரு முறை மட்டும் பயன்படுத்தும் பிளாஸ்டிக் அற்ற மாநகராட்சியாக தூத்துக்குடியை உருவாக்க ஒத்துழைக்குமாறு கேட்டுக் கொள்கிறேன் என்று கூறினார். நிகழ்ச்சியில் வியாபாரிகள் திரளாக கலந்து கொண்டனர்.

முன்னதாக பாத்திரங்களை கொண்டு வந்து உணவு வாங்கும் நபர்களுக்கு இலவசமாக சாம்பார் தூக்குவாளி வழங்கும் நிகழ்ச்சி தென்பாகம் போலீஸ் நிலையம் அருகே உள்ள ஒரு ஓட்டலில் தொடங்கி வைக்கப்பட்டது. 

தூத்துக்குடி:

தூத்துக்குடி மாநகராட்சி ஆணையாளர் ஆல்பிஜான் வர்க்கீஸ் வெளியிட்டுள்ள செய்திக்குறிப்பில் கூறியிருப்பதாவது:-

பாலித்தீன் பயன்பாட்டால் சுற்றுச்சூழல் மாசு மற்றும் பல்வேறு விதமான பாதிப்புகள் ஏற்பட்டு வருகின்றன. இதனை தடுத்து வருகிற சுதந்திர தினத்தன்று ஒரு முறை மட்டும் பயன்படுத்தும் பிளாஸ்டிக் அற்ற மாநகராட்சியாக தூத்துக்குடி மாநகராட்சியை மாற்றுவதற்கான நடவடிக்கை மேற்கொள்ளப்பட்டு வருகிறது. அதன்படி ஏற்கனவே தடை செய்யப்பட்டுள்ள 50 மைக்கிரான் தடிமனுக்கு குறைவான பாலித்தீன் பைகளோடு 15.7.2018 முதல் ஒரு முறை பயன்படுத்திவிட்டு தூக்கி எறியப்படும் பிளாஸ்டிக் கப்புகள், தட்டுகள் ஸ்பூன்கள், ஸ்ட்ரா போன்றவை தடை செய்யப்படுகிறது.

மேலும் 31.7.2018 முதல் தண்ணீர் பாக்கெட்டுகள், காய்கறிகள், பழங்கள் இறைச்சி, டீ, காபி மற்றும் உணவு பதார்த்தங்களை பாலித்தீன் பைகளில் பொதிந்து கொடுப்பது தடை செய்யப்படுகிறது.

எனவே பொது மக்கள் மற்றும் வியாபாரிகள் மாநகராட்சியின் செயல்பாட்டுக்கு ஒத்துழைப்பு கொடுக்க வேண்டும். வழக்கத்தில் உள்ள பிளாஸ்டிக் பொருட்கள் தடை செய்யப்பட்டு தொடர் நடவடிக்கைகள் துரிதப்படுத்தப்பட்டுள்ளதால், தங்கள் வசம் இருப்பில் உள்ள மேற்படி தடை செய்யப்பட்ட பிளாஸ்டிக் பொருட்களை சம்பந்தப்பட்ட நிறுவனங்களுக்கு திருப்பி அனுப்பி விட வேண்டும். அதற்கு மாற்றாக தேவைப்படும் மாற்றுப் பொருட்களை கையாள தேவையான நடவடிக்கைகள் எடுத்துக் கொள்ள வேண்டும்.

பொது மக்கள் கடை வீதிகளுக்கு செல்லும் போது தங்கள் வீடுகளில் இருந்து துணிப்பைகள், வயர் கூடைகள், பாத்திரங்கள் போன்றவற்றை கொண்டு செல்ல கேட்டுக் கொள்ளப்படுகிறார்கள். மாநகராட்சி எல்கைக்குட்பட்ட பகுதிகளில் அமைந்துள்ள கல்வி நிறுவனங்கள், மருத்துவமனைகள், அரசு அலுவலகங்கள், வங்கிகள், தனியார் நிறுவனங்கள் போன்றவற்றில் பிளாஸ்டிக் தடை நடவடிக்கை மேற்கொண்டு, பிளாஸ்டிக் தடை செய்யப்பட்ட பகுதி என அறிவிப்பு பலகைகள் வைக்கப்பட வேண்டும்.

மேலும் மேற்படி நடைமுறைகளை பின்பற்ற தவறும் பொது மக்கள் மற்றும் வியாபாரிகளிடம் தடை செய்யப்பட்ட பிளாஸ்டிக் பொருட்களை பறிமுதல் செய்து சட்ட ரீதியான மேல் நடவடிக்கை எடுக்கப்படும்.

இவ்வாறு அவர் தெரிவித்துள்ளார்.